بسم الله الرحمن الرحيم
انا عارفه ان من زمان قوى مفيش اى حاجه منى بس والله ضغط شغل
وعارفه انى مردتش على التعليقات بس والله مش تجاهل منى لاسمح الله بس مكنش فى وقت
على العموم سماح النوبه دى
بصوا يا اخونا انا كنت داخله النهارده وكلى ابتسامه امل ان فى خير جاى
وكنت ناويه اغير اسم المدونه ولو حد عنده اقتراح لاسم احب اسمعه برضو
يمكن عشان حاسه انى جوايا احاسيس كتيره متغيره بس بجد حاسه ان فى حاجه جديده جوايا
وربنا يسامحه بقى طبعا مش محتاجه ان اذكر اسماء دى حاجه معروفه
قتل جوايا حاجه حلوه
وكنت عايزه اقوله ان %30محلتش مشكله ده يمكن كمان انها ذودتها اكتر
عايزه اسالك %30حتديها لمين لموظفين الحكومه طيب ما بلدك الاغلبيه العظمى منها قطاع خاص والبركه فى مجهوداتك برضو اللى خصخصت كل حاجه
ولما ذودت %30 ورفعت الاسعار .... %30 حتعمل ايه طيب ما احنا رجعنا تانى من الاول
وبعدين بلدك الاغلبيه العظمى فيها رزقهم اليوم بيومه يعنى ملهمش مرتب ثابت عايشين عليه يستنوه اخر كل شهر ويرتبوا عليه حياتهم دول يوم معاهم و10 ايام مفيش
حياكلوا من فين انت عايز تعمل فينا ايه تانى
حنفضل لامتى فى نفس الدايره المغلقه دى اتخنقنا ارحمنا بقى ده ربنا بيرحم
انا طول عمرى ومهما شوفت من قسوة عمرى ما حسيت انى ممكن اكره حد او ادعى عليه
بس بجد برافو عليك انت اللى بيقولوا عليه بيخلى الحجر ينطق
كنت عايزه اعرف هى البلد دى كلنا عايشين فيها مع بعض ولا انت فى مكان واحنا فى مكان تانى
كفايه كده البلد حتولع فى بعض
طيب هو مينفعش احنا نتسأل عايزين ايه
هو ده بقى اللى بيقولوا عليه الموت بالبطيء
انا طول عمرى عندى اكيد ويقين ان لازم نطيع اولو الامر منا
بس لامتى كده
احنا تقريبا كده بدأنا فى العد التنازلى لاستقبال ضحايا اولو الامر
هو انت بتكرهنا قوى كده ليه
انزل الشارع وامشى على رجليك وشوف وشوش الناس حوليك
وكميه التعاسه اللى عليها وانت تعرف انت عامل فينا ايه
ده حتى احساسنا ببعض بدء يروح
مفيش حد حيبص لحال حد ولا حيعطف عليه
بجد كفايه كده
ياريت يكون فى لحظه ندم ورجوع قبل ما ينفعش الندم
اللهم اجرنا فى مصيبتنا واخلفنا خيرا منها
حسبى الله ونعم الوكيل
على فكره انا برضو مستنيه مقترحات لاسم جديد للمدونه
