Thursday, July 5, 2007

اشمعنى يوم الخميس


بســــــــــــــــــــم الله الرحمــــــــــــــــن الرحيـــــــــــــــــــــم




اشمــــــــعنى يوم الخميس ليه




ليه كل حاجه حلوه بتبقى يوم الخميس او احنا بنخليها يوم الخميس


طول عمرنا من احنا وصغيرين نستنى الاسبوع يخلص عشان يجى يوم الخميس


تيجى تتفق على خروجه مع اى حد يقولك خلاص ماشى خليها يوم الخميس


تيجى تسأل عن فرح فلان او خطوبه فلان يقولولك اه ده يوم الخميس


طيب حتروح سبوع بنت فلان او ابن فلان اه هو مش يوم كذا اه هو فعلا كان كذا بس حيعملوه يوم الخميس


انا عن نفسى محبش ازعل ابدا يوم اخمس



طيب احنا ليه بنقول يوم الخميس



مفتكرش ان احنا قصدنا اليوم نفسه يمكن يكون رمز مثلا


مش يمكن نكون بندرو على حاجه نستناها بس اكيد ان الحاجه دى حتفرحنا حتجدد جوانا احاسيس

بمعنى اصح كل واحد فينا جواه حلم او احلام معينه وعشان هى حلم ممكن تتحقق وممكن لا



يعنى انا لو حلمت حلم جميل حتمنى انه يتحقق وحفضل مستنياه يعنى عايشه على امل

بس عشان انا مش متأكده انه حيحصل بأجله او ببعده بس ده ميمنعش ان برضه عيزاه بس عشان مفقدش امل انه يحصل

بمعنى اصح ان كل انسان بيرسم لنفسه حلم بس الاكيد انه حاجه حتفرحه وحيفضل يستناه


نقول ان كل واحد جواه حلم او بيحط جواه حلم يعنى حاجه يعيش عشانها

ممكن يكون امل ممكن يكون هدف بس الاكيد انه حلم بختلاف حجم الحلم ونوعه بالنسبه للاشخاص والاعمار

وممكن كمان الواحد يعيش حلم مش بتاعه بتاع حد يعرفه بس المهم انه يبقى عايش لحاجه


اى انسان بيدور على سعاده كبيره او صغيره مش مهم المهم تكون


طالت مدتها او قصرت برضه مش مهم المهم تكون

42 comments:

أمــانــى said...

ايوا يوم الخميس اللى بتمشى فيه بدرى واللى نفسى اغير اليوم معاكى وانتى برضو مفيش فايدة
أهــئ أهــئ
ويوم الخميس يوم التقارير الاسبوعية وتسبينى وتقعدى تكتبى في البوستات برضو يوم الخميس ويوم اللى بتمشى فيه بدرى وتسبينى فى عز الطحن اه ما هو يوم الخميس براحتك يا باشا
:D
اكيد كل واحد فينا جواه حلم نفسه يحققه وبيستناه واكيد ربنا كريم هيحققلك وهيحقق لكل واحد حلمه او بمعنى اصح امله وامانيه بس كل حاجة بالصبر
سـلامى ليوم الخميس

عصفور المدينة said...

يوم الخميس ذكريات جميلة بدأ معي بعد ما قررت في تانية اعدادي متهيأ لي قبل ما انت تتولدي
اتفقت مع أبي إن يوم الخميس لا يكون فيه مذاكرة وهو وافق وكنت مستغرب ومن يومها أصبح له مكانة عندي
بس ممكن الإنسان يعطي تمييز لحاجة بحيث تكون مصدر فرحته وتكون موافقة للفطرة زي فرحتنا واحتفالنا بيوم الجمعة وممكن لا تكون موافقة
وفعلا الآمال هي اللي بتصنع الإنجازات
عندك مثلا أنا لما بامشي وعايز أمشي مسافات طويلة أحط لنفسي أهداف وهمية زي مثلا عايز اوصل الإشارة دي قبل ما تقفل
عايز اسبق الراجل اللي قدامي
عايز أوصل المكان الفلاني قبل ما تيجي الساعة 6
وهكذا يطول نفسي في المشي وهي نفس الفكرة الي أردتيها أنت بس د تطبيقي العملي لها

علاء said...

عشان صابح الجمعة
اجازة رسمية
:)

mo'men mohamed said...

بصراحة
بعد ما أعز إخوانى راح فى المصيف
أنا مش شياف فرح فى أى يوم
السلام عليكم

mohand said...

اللسلام عليكم
طبعا لانه صابح جمعه
الاجازه
ودا مش في مصر بس
يعني في الدول اللي اجازتها الاحد
بيكون السبت عندهم حلو
مش هيصحو بدري
ولا وراهم دوام
والاطفال مش بيذاكرو زي ما قال الاستاذ عصفور
انا كمان مكنتش بذاكر في اليوم ده
دا غير ان فيه اسباب تانيه كتير قوي
بس انتي ايه اللي خلاكي تفكري فيه
وعلي فكره الحلم مش صعب اننا نحققه
بس تفرق في مدي اهميته بالنسبه الينا
دا اللي بيفرق
تحياتي ليكي

الطائر الحزين said...

السلام عليكم
يوم الخميس فى الدراسة كان نصف يوم
وغالبا بتلاقى اخر حصتين العاب
وبنروح فيهم

الحلم انا مش عارف فعلا ممكن الحلم يتحدد ازاى يعنى هو متغير ولا يمكن من كثرة الاحلام ما عادت تفرق تحقق ام لا واختلاط الاحلام بالاوهام واختلاطها ايضا بالضروريات

جزاك الله خيرا

ياسر سليم said...

لأن يوم الخميس


وراه يوم الجمعة


تحياتى

الكلام نوعان :كلام فارغ وكلام مليان كلام فارغ said...

يوم الخميس لانه بيبقى بعده الجمعه اجازه والواحد اما يحب يتجوز او يخرج لازم يتمتع باليوم ويسهر ويناااام
لازم عشان يقبل على اسبوع جديد وبنشاط جديد

BinO said...

المعني نفسه جميل
عشان كده عد الأام مش بيوصل لحاجة
والتحضير والتفكير للي لسه ماجاش بيقده معناه
والأمل شئ جميل ولكن لازم أن لا يطغي علينا فنتوقف عن التفكير
ويوم الخميس يوم جميل عشان بعده الجمعة

نسرين - أمة الله said...

السلام عليكم
مانو هو خميس واحد فى الاسبوع
انتى عارفه لازم اروح النادى
يا رب يا مانو ربنا يحققلنا احلامنا اللهم امين

نسرين - أمة الله said...

السلام عليكم
استاذ عصفور المدينه
على فكره ودى اكيد مش جديده عليك حضرتك ذو فكر عالى وواسع المدى وتقريبا كل جمله فى تعلقك كانت بتعبر عن المعنى اللى جوايا
انا مش قاصده يوم الخميس
فعلا كنت قاصده
ممكن الإنسان يعطي تمييز لحاجة بحيث تكون مصدر فرحتهاودى كانت جملتك
وكمان
عندك مثلا أنا لما بامشي وعايز أمشي مسافات طويلة أحط لنفسي أهداف
وهكذا يطول نفسي في المشي وهي نفس الفكرة الي أردتيها
انت فعلا عرفت توصل لقصدى وبجد بجد ردك عاجبنى قوى
بارك الله فيك وجزاك كل الخير

نسرين - أمة الله said...

السلام عليك
علاء
ايوه هو الجمعه حنااااااااااااااااام
ومفيش شغل

نسرين - أمة الله said...

السلام عليكم
مؤمن
البقاء لله وحده
ربنا يصبر قلبك ويجيرك فى مصيبتك ويخلفك خير منها
ربنا يجعل ايامك كلها فرح

نسرين - أمة الله said...

السلام عليكم
مهند
دا غير ان فيه اسباب تانيه كتير قوي
ايه هى بقى الاسباب التانيه وراك وراك لغايه لما نعرف
بس فى احلام بعيده المنال او مينفعش نحلم بيها لانها مش لينا

نسرين - أمة الله said...

السلام عليكم
الطائر الحزين
برضه لسه عايزه اعرف ليه حزين
الحلم انا مش عارف فعلا ممكن الحلم يتحدد ازاى يعنى هو متغير ولا يمكن من كثرة الاحلام ما عادت تفرق تحقق ام لا واختلاط الاحلام بالاوهام واختلاطها ايضا بالضروريات
معاك حق
وجزاك الله خير

نسرين - أمة الله said...

السلام عليكم
ياسر سليم
لا متوقعتش ده ردك انا مش قصدى الخميس
نفكر شويه

نسرين - أمة الله said...

السلام عليكم
الكلام نوعان :كلام فارغ وكلام مليان كلام فارغ
لازم عشان يقبل على اسبوع جديد وبنشاط جديد
معاكى حق لازم الواحد ياخد هدنه عشان يقدر يواصل

نسرين - أمة الله said...

السلام عليكم
بينو
يا حمدلله على السلامه
ايه الغيبه دى انت زعلان مننا ولا ايه
والأمل شئ جميل ولكن لازم أن لا يطغي علينا فنتوقف عن التفكير
مش فاهم قصدك يعنى نوقف على الحلم بعينه ومنفكرش فى غيره

نسرين - أمة الله said...

السلام عليكم
علاء
هو الجمعه يحسسك بالراحه
بس هش هو المضمون

mohand said...

السلام عليكم
مفيش جديد ولا ايه؟
منتظرين

إنـســانـة said...

ياااااااه يا نسرين
تصدقى انا كنت عاوزة اكتب عن يوم الخميس ده بردو؟؟
مستغربة انا بحبه اوىىىى كدة ليه
بجد بموووووووووووووووووت فيه
من وانا صغيرة ويوم الخميس ده عمرى ما اذاكر فيه ابدااااااااا
واستنى المسرحية اللى التليفزيون بيجيبها
واتفرج ع التلفزيون براحتى
واسهر براحتى
وهيييييييييييصة
حتى دلوقتى بعد ما خلصت الكلية وكل الايام بقت زى بعضها تقريبا بردو يوم الخميس مختلف تمامااااااااا عندى
لدرجة انى لو لاقيت ماما وبابا جايبين قناة الجزيرة اقولهم حد يتفرج ع الحاجات دى النهاردة؟؟؟!!!
يستغربولى اوى .. اقولهم ده النهاردة الخمييييييييييييس

تصدقى من كتر حبى فيه بقيت احب اليوم اللى قبله - الاربع واللى بعده - الجمعة
هههههههههه

ياااااااه اليوم ده تحفة بالنسبالى

وربنا يكرمك انك اتكلمتى عنه عشان انا بحبه جداااااااااا

سلامى وحبى لكى

إنـســانـة said...
This comment has been removed by the author.
نسرين - أمة الله said...

السلام عليكم
حاضر يا مهند

نسرين - أمة الله said...

السلام عليكم
انسانه
والله يا بنتى انا مكتبتش كل اللى جوايا من ناحيه اليوم خوفت المناس تقول فى حاجه بينى وبينه ههههههههه
بس بجد انا بحبه قوى وبستناه يجى من يوم الجمعه
يا رب اجعل ايامك كلها زى يوم الخميس ويفرح قلبك على طول

Fedaa AL Eslam said...

السلام عليكم ورحمة الله وبركاته

انا بحب يوم الخميس جدا بس عشان لما كنا صغيرين انا واختى فى المدرسه كان بابا الله
يرحمه بيدينا يوم الخميس اجازة من المذاكرة ويخرجنا نتفسح اليوم ده

عشان كده بصراحه انا بحبه

ياسر سليم said...

انا بخير والحمد لله

بس انا ما كنتش عايز ارد على تعليقات التدوينة الأخيرة بس

ياسر سليم said...

شكراً على السؤال والإطمئنان

سكتم بكتم said...

يولاد بلدنا يوم الخميس حكتب كتابي و أبقا عريس

شوفي من فترة طويلة وشغلي خلاني شغال تقريبا كل أيام الأسبوع حتي الجمعه ومع ذلك فعلا يوم الخميس لية مذاق خاص

ملحوظة ذكية تستحق التسجيل

تحياتي

sendbad said...

احنا دايما بنقص افراحنا ومنعرفش نستمتع بيها حتي يوم الخميس زي ما بنكون بنحب نعذب نفسنا

mohand said...

السلام عليكم
وبعدين في قلة سمع الكلام دا بقي
مش قولتي حاضر ؟
فين الجديد بقي
مستني
------------
ابقي ادخلي مصريات وقوليلي رايك في اخر موضوع
اكيد هيعجبك

طهقان said...

تتصورري

الواحد لما بتقدم في العمر شوية
بيشعر ان الايام كلها شبه بعضها

وماعادتش تفرق معه خميس من اثنين

تحاتي

علاء said...

ده موضوع التجمع ياريت أعرف رأيك

المدوّن خانة

صاحب البوابــة said...

اعتذر عن التحليق خارج السرب

لكنني أريد رأيكم للأهمية في آخر موضوع لي

بعنوان

شكــر وإعتــذار

تحياتي

eduardo waghorn said...

Salaam from chile, Southamerica!
I admire very much arabian culture, my grandparents from my mum was from Syria...
Please, visit me and send a comment, even an arabian:)
shukran!!

نسرين - أمة الله said...

السلام عليكم
Fedaa AL Eslam
الله يرحم بابا ويرحم اموات المسلمين اجمع اللهم امين
وربنا يفرح قلبك دايما

نسرين - أمة الله said...

السلام عليكم
سكتم بكتم
يا رب يجى يوم الخميس اللى حتكتب فيه كتب كتابك بس متنساش تعزمنا

نسرين - أمة الله said...

السلام عليكم
سندباد
احنا مش بنقص افرحنا بس احنا بنخاف عليها

نسرين - أمة الله said...

السلام عليكم
مهند
خلاص راجعين

نسرين - أمة الله said...

السلام عليكم
طهقان
مواضيعك بتفطسنى من الضحك
اه صحيح هو كتب الكتاب اللى كنت رايحه مع طهقانه لما رميت الجزمه مكنش يوم خميس هههههه

نسرين - أمة الله said...

السلام عليكم
علاء
علم وجارى التنفيذ هههه

نسرين - أمة الله said...

السلام عليكم
صاحب البوابه
انت مش بس صاحب البوابه انت صاحب مكان يعنى المكان مكانك ومن غير اعتذار

طهقان said...

بالنسبة لسؤالك
والله يا بنتي
الموقف اللي كنت فيه ماخلانيش افتكر احنا كنا في انهو يوم

بس الحمد لله
عدى على خير



خميس بقا
والا حد

كلها ايام