Thursday, May 10, 2007

نهايه نوفل فى حمرا دوم


بسم الله الرحمن الرحيم

اللهم اعنا على ذكرك وشكرك وحسن عبادتك

حلقه أخرى من حلقات سلسله منسيات




مين هو عمنا نوفل ده وايه حكايه حمرادوم

حمرادوم قريه من قرى الصعيد وبالتحديد فى نجع حمادى بقنا

والواحد طبعا مش حيفكركم قد ايه المناطق ديه صعبه جدا او موحشه بالعربيه الفصحى سواء فى الطبيعه بتاعتها او من ناحيه الناس اللى عايشن هناك وافكارهم والعصبيه اللى عايشين بيهاهى ممكن تكون كويسه اذا كانت زى ما بنقول

اللى ملوش كبير يشتريلوا كبير

يعنى بيجى من وراها الخير

بس بقى لو العصبيه ديه متمثله فى شحص ما هو الا كميه من الشر والرعب والاجرام زى كده

عتريس وجواز عتريس من فؤاده بالطل والكلاه ده

والاصعب بقى لو الشر ده مسنود يعنى فى حد وراه

بس اللى يضحك لو الشر ده حيقلب على الكل يعنى بلغتنا احنا اتفرعن

اه اه يا فرعون ايش فرعنك

يبقى اللى مفروض يحصل ايه والله زى ما قالوا وقال هو انه يتسرح أو يتصفى كارت محروق يعنى

ايه يا عم احنا فى مافيا روسيا هناولا ايه

نتكلم بقى شويه على عمنا نوفل أو زى ما سموه خط الصعيد

نوفل سعد ربيع الراجل ده عنده 40 سنه وتخيلوا سنه الصغير ده اللى هو المفروض ريعان الشباب عند الرجال او مرحله النضوج يعنى يدوبك لسه بيبدؤا يعملوا انجازات بس الراجل ده كسر القاعده خالص

قال يا اخونا الراجل ده عنده 40 سنه بس

لا طبعا مش بس ومن الاعيان عنده فدان ونصف أفيون و15 قضيه بمجمل 80 سنه حبس جزء منها اشغال شاقه مؤبده عشان قتل اخوه واشغال شاقه تانيه عشان قتل مجندين أمن مركزى

والباقى بقى متعدش زراعه وتجاره ومخدرات وقتل وسرقه بالاكراه ومقاومه سلطات

يا ناس الراجل ده اعتقل سنه 1986 لخطورته على الامن العام

ايه ده كل ده وسيبينه ماهو هو ده اللى احنا استغربناله

قال وانا ماشى فى الصحرا وقعت عليا ازازه ازاى ما انا استغربت

بس احنا بقى دورنا ورا الازازه قصدى عمنا نوفل وعرفنا عرفنا ايه

ايه يا عم نوفل مالك متفرعن كده ليه

قال ايه فى فتره ما بين 1995 و 1998 فاكرين الفتره ديه اللى الارهاب كان فارد فيها ضلوعه

طب يا سيتى وايه دخل ده بده ما انا جيالكم اهو بس الصبر

الحهات الامنيه استعانت بخط الصعيد نوفل

بس ايامها مكنش لسه أخد اللقب اللى بصراحه استحقه طبعا عن تعب وجداره

لا لا بالراحه علينا وفهمينا واحده واحده

افهمكم الصعايده او بعضهم عندهم حاجه انتم دلوقتى علتين وحنروح بعيد ليه

عيله نوفل سعيد ربيع اللى هيه الرباعيه وعيله الهنادوه كان بيناتهم خصومه هههههههه همم بيقولوها كده ححكيلكم عنها بعدين

بس بقى فضلوا دول يقتلوا واحد من هنا التانين يردوا عليهم بواحد من عندهم

فهنا بقى كان الذكاء حاجه كده بالشبه

انا دلوقتى لو استعنت بالراجل ده وحطيته ساتر بالطبع محدش حيقدر يقربله لحسن يبقى تار

وندخل بقى فى مولد وصاحبه غايب ويبقى موسم جنى الناس

وفعلا اللى سمعناه ان الجهات الامنيه كانت عامله ابراج حراسه قدام الاماكن الذات اهميه فى نجع حمادى وكان بيحرسها رجاله نوفل

هيه بصراحه ملعوبه صح

وعادى ومش عيب اللى تغلب بيه العب بيه

بس دايما تاتى الرياح بما لا تشتهى السفن

الراجل ده شاف نفسه اه طبعا الذراع الايمن للحكومه مين قدك يا سيدى

بس برضه عشان احنا هنا فى ذكرى راجل ميت نقول اللى لينا واللى علينا والله اعلم

المذكور اعلاه خط الصعيد نوفل قال انه كان على استعدا انه يسلم نفسه

يعنى ايه بقى انتى عايزه تقولى انه كان حيتحاكم فى 80 سنه حبس

والله يا ناس هو اللى قال مش انا يعنى انا حجيب حاجه من بيتنا

ما عمنا جمال سليمان فى حدائق الشيطان تاب ولا هيه حلوه فى التمثيل مره فى الحقيقه

بس بقى مكنش عايز يسلم نفسه لبعض ظباط قنا ليه قال عشان عايزين يصفوه ميحكمهوش

هوشــــــــــــــــــشش منجيبش سيره

بس استنوا كان بيقول انه حيكشف اشياء خطيره واسرا مفزعه وحتودى الكل فى خبر كان

وبعدين فى حد بيزرع فدان ونصف أفيون ومحدش يحس بيه

بس بقى مخلاص مش قولنا هوشششششش

متوديناش فى داهيه

والله يا ناس هو اللى قال

اه صح بسرعه كده عشان مننساش حكايه العلتين

الرباعيه عيله نوفل سعيد ربيع والهنادوه وميراث الدم ايه الغنى الفاحش ده دم مره واحده

كان بسبب ايوه هو السبب الكبير ده الحد الفاصل بين الاراضى الزراعيه

عمنا سعيد ربيع والد نوفل كان عايز يحول الباطل والله ما كنت اعرف معناه اللى هو الحد الفاصل بين الاراضى بتاعتهم لترعه الهنادوه طبعا مرضوش أستأجروا احمد عذار برضه معرفش مين ده المهم قتل والد نوفل بس بقى وواحد من هنا وواحد من هنا لغايه لما بقوا عشره

الحمد لله ان نوفل مات والا الواحد كان خايف ليطلع من عندهم ويلقى حتفه حلوه الحته ديه

بس بقى خلينا فى المنظر الاخير نهايه الخط

بعد محاصره دامت لآكثر من 6أشهر ليه يعنى مش عارفين يدخلوا

اه البيت عليه حراسه 200 رجل من رجال نوفل كتيبه يعنى فاضلهم 2 عساكر ويعلنوا الحرب على رأى عمنا اللمبى

وعامل قدام البيت مجرى مائى عشان المدرعات متعرفش تدخل مدرعات مره واحده مش بقول لكم الحكايه كبيره

اربع مدرعات و30 سياره شرطه

الظاهر ان الراجل ده كان فعلا مفروض يتصفى

بس بقى المعركه استمرت 7 ساعات واستخدم فيها قنابل مسيله للدموع وكميات كبيره من الرصاص وكانت النهايه

انتصرنا انتصرنا

وقتل الخط نوفل واصيبت ابنته وابن شقيقه ومجندين

بس بقى فى حاجه تانيه احنا مش عارفينها

والله لو عرفتوا انتوا ابقوا قولولى

يا أخونا الناس دول محتاجين تبصير يعنى محتاجين مننا ان احنا نفهمهم أكتر ونوصل لنقطه اتفاق نعرف من خلالها التعامل معاهم

مينفعش نبقى بعاد عنهم كده فى فجوه واسعه قوى ما بنا وياريت متوسعش اكتر

الحق انا بقى استخبى

الله المستعان

اللهم انى أسألك من خير ماسألك منه عبدك ونبيك سيدنا محمد عليه الصلاه والسلام

واستعيذ بك من شر ما أستعاذ بك منه عبدك ونبيك سيدنا محمد عليه الصلاه والسلام








24 comments:

Ahmed Elmasry said...

الشعب المصري يحتاج لتوعية والشرطة
بتستخدمالي زي ده عشان تلهي الناس
بلاخيبة

Ahmed Elmasry said...

وشكرا علي البوست دة

و مستنين الجديد

Dr.khaled said...

اللهم اهلك الظالمين بالظالمين
واخرج عبادك الموحدين من بينهم سالمين

khaled said...

اقول امين قبل ما اتكلم
امين على دعائك و دعاء الدكتور خالد
ايه ده؟
نوفل حتة واحدة؟
و المرة الجاية بوش بقى؟
:)
نوفل مات و الحكومة لسة ماماتتش
يعنى الحكومة عملته من رجالتها و اهه مات و الحكومة هى هى هاتعمل غيره من رجالتها
و نوفل راح و نوفل جاى
و سلميلى ع القصب

أمــانــى said...

الســـلام عليكم
امــين على الدعاء
طبعا كالعادة الامن بتعمل ناس وبترجع تقتلهم وتتخلص منهم برضو لما تحس بالخطر منه مش على الناس طبعا لا على نفسهم بس

نسرين - أمة الله said...

السلام عليكم
استاذ احمد المصرى
الشعب المصرى محتاج يتجمع
لان التوعيه برضه حتبقى مختلفه عن مكان ومكان طبعا بحسب الاعراف والتقاليد اللى بتحكم كل مكان
يبقى برضه حيكون فى فجوه
شكرا ليك

نسرين - أمة الله said...

السلام عليكم
استاذ خالدوليس بخالد
ايوه افضل ادعيلنا كده
عشان ربنا يكرمنا خير
امين

نسرين - أمة الله said...

السلام عليكم
استاذ خالد
عارف الحكومه عامله زى ايه
زى Xاكس عارف الفيلم ده بتاع فؤاد المهندس
يعنى xاكس عمره ما يموت
والله احنا مش عايزنها تموت احنا عايزينها تتغير
هو مش دوام الحال من المحال

نسرين - أمة الله said...

السلام عليكم
امانى
هي الحكومه بتعمل ناس بس هي بتعمل اى حاجه هى عيزاها
ربنا ينجينا

Hussam Zeyada said...

الاخت نسرين لى تعليق عندك على بوست ان تنصروا الله فلا غالب لكم ارجوا قرائته هنا

نسرين - أمة الله said...

السلام عليكم
استاذ ابو حمزه
انا شوفت التعليق وشكرا ليك واسفه على التاخير فى الرد
وغيرت صيغه الدعاء

الطائر الحزين said...

السلام عليكم ورحمة الله
ان الله سبحانة وتعالى لم يأمر رسولة ان يساعينن بقتال المشركين بالمشركين
اوعوا تتخيلوا ان المسلمين كانوا ينتصروا بشطارتهم الايمان اولا وكان من وصاية الرسول وخلفئة لقواد سرايا الحرب هو تقوى الله اولا فلو كان هناك ايمان ما استعان الحكام بالظلمة ولكن كانوا استعانوا بايمانهم وتقواهم
اللهم اجعلنا من عبادك المتقين
اسف على الإطالة وجزاك الله خيرا
معلهش مش كدة برديك

كراكيب عادل said...

نسرين لازم تعرفي الناس من قريب قوي

انا من الصعيد ومش زي ما تخيلتي كدة لو عرفتي ان الصعيد مليان شباب زي الفل ودكاترة ومهندسين ومثقفين وناس طموحة جدااا وحفنة من هؤلاء النوفليات وحفنة من غيرهم

الاغلبية الكويسة مش ظاهرة ليك علشان مش هتعرفي انهم صعايدة غير لما تسئليهم

انا عشت في القاهرة واسماعلية واسكندرية وسافرت امريكا بكل ولاياتها ولندن وتايلند واليابان وكل دول الخليج ومش لاقي مكان بالي مرتاح فية غير عند جذوري

مدونتك جميلة واسلوبك في الحكاوي يجنن
والدعاء الاخير جميل لو عايزة تعرفي اكتر اميلي هناك

نسرين - أمة الله said...

السلام عليكم
الطائر الحزين
ما المشكله انهم بيكونوا وصلوا لمرحله مفهاش اى ايمان
ربنا يتولنا برحمته

نسرين - أمة الله said...

السلام عليكم
كراكيب عادل
وزى ما اتفقنا مفيهاش اى كراكيب
على فكره انا من الصعيد وعايشه هناك كمان وعارفه ان فى ناس منهم كويسين جدا والصعيد على فكره بيخرج ناس ليها بصمات كبيره
انا مش بتكلم على دول انا بتكلم على نوع تانى منشف دماغه خالص
زى مثلا فى قرى الفلاحين
على فكره انا بحب الصعيد جدا لانهم لسه برضه جواهم الاصاله وحاجات كتره ضاعت فى المدن والتمدن
بس ده مايمنعش ان فى حاجات لازم تتغير
بس برضه مع احتفاظهم بالطبع اللى فيهم والاخلاق ديه معادله صعبه انا عارفه
بس بقول يا ريت
وشكرا ليك وان كان على الاسلوب فأحنا يادوب بنتعلم منك

friend said...

اسلوبك متميز
اللهم اهلك الظالمين بالظالمين

مشروع انسان said...

طب بالله عليكم كل ده يحصل فى بلد ومحدش يسمع عنه حاجة الا بعد نهاية الحدوتة ده كلام يا ناس ويقولوا حرية ومش عارف ايه والاعلام اتطور وشفافية ونفس اللى حصل مع عزت حنفى استعانوا بيه وكان من رجالتهم وبعد كده خلصوا عليه احنا فى شيكاغو ولا ايه والله حكومة فاشلة وناس عاجزة مش عارفه تسيطر على البلد ربنا يخلصنا منهم قريب

Unknown said...

طول مالحال زى ماهو ماتغيرش يبقى احنا فى انتظار نوفل جديد
ربنا يصلحنا ويصلح القائمين على امرنا

نسرين - أمة الله said...

السلام عليكم
استاذ صاحب البوابه
ان شاء الله ربنا يفك حبس الشيخ ابو الفتوح
وربنا ينصر المسلمين والاسلام

نسرين - أمة الله said...

السلام عليكم
حزر ربنا يخليك
انا اعرف ان الجزر بيقوى النظر صح ولا كلام بضحكوا بيه علينا
على فكره موضوعك حلو

نسرين - أمة الله said...

السلام عليكم
امام الجيل
ماهو دايما الجمهور أخر من يعلم

نسرين - أمة الله said...

السلام عليكم
مناجاه
اكيد ان شاء الله حيكون فى تغير

أمةالله بنت عبدالله said...

و اله عندك حق يا نوسة فعلا فى الصعيد محتاجين توعية فى حاجات كتير و خاصة فى قرى و نجوع الصعيد , على فكرة انا كمان صعيدية صميمة من مركز اسنا فى محافظة قنا , انا صحيح مش عايشة هناك بس باروح كتير و بلاحظ حاجات كتيربتدايقنى و محتاجة تتغير بس بلاقى قدامها حاجات اجمل و اكيد منها و اهمه الاحتفاظ بالاخلاق اللى فقد معظمها فى المدينة , و زى ما قلت يا عادل ان الصعيد فيه دكاترة و مهندسين و شباب زى الفل فده شئ اكيد و الدليل على كده انت و نسرين و امانى و انا ..... الخ و كل امدوناتية و النبغات الصعايدة , بس هيا هنا كانت تقصد الناس اللى فى قرى الصعيد او الصعيد الجوانى زى ما بيقولوا , و الناس اللى من عينة نوفل او عندهم استعداد يكونوا زيه

نسرين - أمة الله said...

السلام عليكم
امه الله بنت عبد الله
هو فعلا ده اللى انا قصدته