كل عيد أضحى وأنتم بخير

بسم الله الرحمن الرحيم

ايووووووووووه لسه عايشه

انا عارفه ان ده السؤال اللى بتسألوه دلوقتى هيه البنت دى لسه عايشه هههههههههههه

انا قولت بما ان عيد الاضحى دخل يبقى لازم اعيد عليكم واوصيكم الوصايا العشر

بس والله الدخول كان صعب شويه لغايه لما نفضت المدونه من التراب اللى كان عليها وشلت العناكب اللى كانت مستعمراها اخد منى فتره شويه ههههههههههههه

المهم انا بطمن الناس اللى سألت عنى انا كويسه الحمد لله ومفيش حاجه وحشه ان شاء الله

بس يمكن ضغط الشغل ومفيش وقت لحاجه خالص

نيجى بقى للمفيد

مش حوصيكم كلوا من اللحمه والفته لغايه لما تفتصوا بس اوعوا تنسوا الغلابه

وادعوا دايما بنصره الاسلام والمسلمين وربنا يعيد علينا اعيادنا واحنا دايما فى عزه وكرامه

شكرا ليكم قوى

خلاص بقى مش حطول عليكم

كل سنه وانتم طيبين

وأشوفكم على خير

عيد سعيد على الامه الاسلاميه اجمع

بســــــم الله الرحمـــــــن الرحـــــــيم

كل سنه والامه الاسلاميه اجمع بخير

مش حقول كلام كتير بس بجد وحشتونى

يعنى فعلا الواحد حس ان فى ناس كتيره غاليين عليا خالص

ربنا يكرمكم اجمع بكل الخير

ويعيد علينا رمضان اعوام عديده

ويدوم علينا نعمه الاسلام وكفى بها نعمه

اللهم تقبل منا رمـضان

صلاه الله مولانا على طه الذى جانا

بســـــــــم الله الرحمـــــــــــــن الرحيــــــــــــم

ختامه مسك ان شاء الله

الكلام ده اسمه تراث عربى من واحد اسمه ( حسام عكاشه

صلاه الله مولانا على طه الذى جانا

صلاه الله على المختار ضمين الامه من النار

يبقى شفيعنا يوم نحتار وفوق صراطه عدانا

صلاه الله على المحبوب دوانا وطب كل قلوب

يوم ما يظهر المكتوب يوم الراجح ميزانا

صلاه الله عليه الزين لشفاعته احنا عايزين

بالجنه بنكون فايزين الفردوس عليانا

صلاه الله على ا بن قريش هاشمى وزى نسبه مافيش

اللى فى مكه كان بيعيش يحارب الكفر واوثانا

لمكه وديارها هجر ولارض المدينه هاجر

قالوا قوم بنى النجار علينا طلع البدر جانا

صلاه الله من المعبود على العدنانى اصل جدود

يوم نلقى الصراط ممرود برحمته ربى يتولانا

عليه افضل صلاه الله محمد بن عبد الله

يتم الاب جده رباه خير الخلق انسانا

كل سنه وانتم طيبين وربنا يجعله خير على الامه الاسلاميه اجمع ان شاء الله

وكده نقدر نقول ان ده اخر كلام لغايه بعد شهر رمضان ان شاء الله

امانه امانه امانه

ادعولى

معلش

بســـــــم الله الرحمــــــــــن الرحيـــــــــم

لما كنت فى القاهره كنت عند واحد بيصلح الا حذيه (الجزم ) الراجل ده اسمه جورج

والله انا مش عارفه اذا كان اللى حكاه عن نفسه كلام حقيقى ولا يعينى من غلبه واحلام اليقظه هى اللى خليته يتخيل

المهم ان الراجل ده كان بيقول انه كان عايش فى ايطاليا من عشرين سنه ومن بعد ثانويه عامه

ودرس هناك حاجه بتختص بالاطراف الصناعيه

بس اللى استغربناله انه لما رجع يشتغل شغلانه زى دى

قال دى شغلانه ناسى وبعدين اللى خلانى اعمل كده ان لما رجعت البلد حسيت ان الطب هنا مش اكتر من تجاره

عشان كده انا محبتش ادى علمى لحد يتاجر بيه ده كلامه هو ويمكن يكون صح ويمكن غلط

قولناله طيب انت ايه اللى رجعك ما كنت فضلت هناك

قال دى بلدى وكان لازم حرجع ليها وكفايه ان انا دفعت ثمن غربتى ان انا مشوفتش والدى قبل ما يموت

قال لنا انا عندى واحد صاحبى لسه عايش هناك ومش ناوى يرجع الا لما حاجه واحده تموت وتنتهى

قال لنا عرفين ايه هيا

قولنا زى ما كل الناس بتقول لما يموت ******ك

قال لنا هو سبب من الاسباب بس مش هو ده

قال هو مش حيرجع الا لما تموت .............معلش

قولنا معلش

قال اه

احنا عايشين بالكلمه دى معلش

اى حاجه غلط نقول خلاص معلش

كل اساءه تتوجهه لينا رد فعلنا ميكونش اكتر من خلاص معلش

اى حق من حقوقنا منعرفش ناخده نقول خلاص معلش

نبقى اللى ظلمنا نكون قربنا نمسكه نخنقه واول ما يجي قدمنا نقول خلاص معلش

حاجه جميله اننا نسامح

بس فين حقنا

بنسمع كتير ان فلان لو شاف .............ك قدامه حيخنقه وميسبهوش الا لما تطلع روحه فى ايده

وصدقونى ان فلان ده برغم كل ظلمه واستبداده وحقوقنا اللى ضايعه على ايديه يوم ما يجرى له حاجه حنفضل نبكى عليه

احنا شعب عاطفى لابعد حد ويمكن انا واحده من الناس ان لو حصلت حاجه زى كده ححزن

عارفين ليه لانه كان بالنسبه لى زى الحبيب اللى وعد حبيبه بحاجات كتيره وفى الاخر خذله بس فى النهايه مش قادر يكرهه

ناس كتيره حتنكر عليا احساس زى ده

انا ببص على الموضوع على انه نفس حترجع فى يوم من الايام وشكلها قربت لربنا ومعاها كام بليون ذنب يوم ما يوقف قدام ربنا وتتعرض عليه صحيفه اعماله حيقول ايه

ومش ببص عليه هو بس انا ببص على حالى وحال اى حد يوم ما نوقف قدام ربنا حنقول ايه

والله الحكايه مش حكايه فرد عمل فينا ايه

احنا كلنا عاملين فى بعض ايه

احنا كلنا وحشين مع بعض مفيناش رحمه على بعض يمكن الاقليه بس ده ميمنعش ان احنا كلنا فينا حاجه غلط

فى حاجات كتيره قوى نسيناه او تنسيناها اخلاقيات اساسيات تربيه ....... الغلط الصح الحرام الحلال

الحكايه مش حكايه فرد

الحكايه حكايه اشخاص بتغرس وبتربى اخلاقيات واساسيات للاخره قبل الدنيا

قليل قوى اللى بيربى عياله على انك لازم تخاف من ربنا قبل ما تخاف من الناس

مش كل حاجه معلش فى حقوق كتيره قوى مفروض ندور عليها ونراعيها ونحافظ عليها

حق ربنا حق دينا حق ناس كتير قوى حولينا حتى لو مبمدوش لينا باى صله بس اكيد ليهم حق

حاجات كتيره قوى بنعملها ونقول انها تخصنا احنا بس هيه اكيد ليها ارتباط باشخاص تانى حتى لو همم فى أخر الدنيا

مش انك ترمى ورقه فى الشارع وتقول عادى معلش دى ورقه لا نراعى ربنا ونراعى الراجل الغلبان اللى طالع عين اللى خلفوه عشان ورقتك انت وورقه ابنك اللى شافك وعمل زيك وورق باقى العيله الكريمه الورقه دى حتتحاسب عليها يوم القيامه

كفايانا خلاص معلش دى مش حتعمل حاجه

الحاجه الصغيره بتكبر وبتبقى حاجات وفى الاخر مش بنبقى عارفين الغلط بدء الذاى ونمسك فى مين ونصلح الذاى

ليه نقول ما كل الناس بتعمل ليه مخلنيش فى نفسى واراعى ربنا

واصبر وليك وليا اجر

منحملش الناس اخطا

كل واحد يدور على نفسه ويشوف جواه ايه غلط وميقولش انا عملت كده عشان كده ده ذنبك انت ومحدش حيشيله غيرك

هو ظالمنا وضيع علينا حقوق كتيره وناس كتير عايشه فى غلب ومهانه ومعهاش حتى اللى يأكلها النهارده

ناس كتير بتموت من حصرتها ومن ذلها ومن الجوع وقله العلاج او عدمه

نا س كتير مش بتلاقى البس اللى يدفيها فى الشتاء او يمكن حتى مش لاقيه المكان اللى يسترها

ناس كتير بتعمل وبتعمل عشان مش لاقيه تاكل ولا تاكل عيالها

وبنات واسر بتهين نفسها يمكن بتبيع نفسهاعشان تقدر تعيش

ايوه ظلمنا بس احنا كمان ظالمين غيرنا وظالمين نفسنا ومحملينها ذنوب

نفوسنا فيها حاجه غلط

نعيب زماننا والعيب فينا وما لزماننا عيب سوانا

اللهم احسن خاتمتنا

بســــــــــم الله الرحمــــــــــــن الرحيـــــــــــــــم

فى البدايه انا مكنتش عارفه اسمى الموضوع ايه وكنت ناويه اسيبه بدون اسم بس انا لما سمعت الحكايه مكنتش بقول غير اللهم احسن خاتمتنا اللهم استرنا فوق الارض وتحت الارض ويوم العرض عليك

مش عارفه اذا كان من حقى اتكلم فى موضوع ميخصنش

مش عارفه اذا كان حرام

لما كنا رايحين اسكندريه اخويا جاله تليفون بيقوله ان فلان مات يعنى هو فلان ده دفعتى بصراحه انا حزنت على اساس انه لسه صغير بس مفيش حد بعيد عن الموت المهم انى قريت الفاتحه واترحمت عليه وخلاص الموضع خلص ونسيته

لغايه امبارح اخويا جيه من بره وبيقول ان موت فلان اللى كانت الشرطه معتبرها انتحار دلوقتى بيحققوا فيه على انه بفعل فاعل

مش عارفه حسيت بصدمه وسكت فتره ومعرفتش اتكلم

قولتله... هو ممتش عادى

قال لى... لا ده فى اول التحقيق قالوا انه انتحار بس دلوقتى التحقيق وصل على انه بفعل فاعل

قال لى هوكان فى أكل بيوحى انه مش لفرد واحد همم لسه بيحققوا وموصلوش للاكيد

وتقريبا هو كان بيحاول يهرب منهم عشان الدم كان فى كل حته فى الشقه

لما تبص للدنيا وتلاقيها صغيره قوى تلاقى ان اللى مات واللى ماسكين القضيه كلهم يعرفوا بعض

كل دول كانوا فى فتره من الفترات فى بلد واحده ولما اتخرجوا سافروا اشتغلوا واتجمعوا فى بلد تانى فعلا صغيره

ولما تبص للحاجه اللى توجعك اكتر وتلاقى ان المشتبه فيهم اصحابه

ممكن الواحد يلاقى الامان الذاى ولا يطمن لمين

لما تبقى عايش معايا عمرى وتيجى انت اللى تضربنى فى ظهرى

قعدت اعيط وانا مش عارفه بعيط ليه

يمكن عشان طريقه الموته

وعشان يبعث المرء على ماهو عليه

ولا عشان ان ممكن اللى يكون عملها فعلا اقرب الناس ليه

انا فعلا حاسه انى مصدومه

انا لله وانا اليه راجعون

ياريت تدعوا له ربنا يرحمه

%15زياده

بســـــــــــــم الله الرحـمـــــــــن الرحيــــــــــم

حد سمع عن 15% زياده على تذكرة القطار

حد سمع ....اه انا سمعت لا انا جربت

احنا حجزنا بزياده 15%على ثمن التذكره الاصلى

قولت يا بت يا نسرين مفيش مشكله يمكن يكون فى فايده يمكن خط السكه الحديد حيتصلح بالزياده دى

او يمكن القطار اللى بيفضل بالشهور مبيتغسلش يمكن حيجيبوا مسحوق بالزياده دى

او يمكن حيزودوا مرتبات عمال النضافه ويفجأونا بالحمامات الجديده

لأ لأ اكيد حيصلحوا المكيفات

وكانت المفاجأه ولو انها لا مفاجأه ولا حاجه ده حالنا ومش حيتغير

اولا احنا وراجعين مكنش فى تذاكر فى المحطه اساسا قال ايه بعد اسبوعين

يعنى ايه طيب والتذاكر راحت فين

فضلنا ندعبس عليها لغايه لما لقيناها فى مكانها المتوقع طبعا

فى السوق السوداء

بصوا يا حضرات احنا جبنا 3 تذاكر بالزياده 15 %الجديده وزودوا كمان 35 جنيه على زياده السوق السوداء على تمن التذاكر الاصلى

عمار................ يا مصر

طيب احنا عملنا كده ليه عارفه ده السؤال اللى جواكم

ما احنا لو معملناش كده كان قدامنا حل من اتنين يا اما نستنى اسبوعين وفى الحاله دى حنترفد من اشغالنا

يا اما نروح لغايه اسوان واقفين يعنى 14 ساعه ده لو وصل فى معاده

يعنى نركب بدون حجز وبرضه حندفع الغرامه

يعنى حتدفع حتدفع يا سيد مفيش مفر

برضه لسه عندى امل فى الاصلاح

القطار كان معاده 6.45وصل المحطه كام 6.35 يعنى مفيش قدامك غير 10 دقايق عشان تدخل القطار ومش انت لوحدك لا ده انت وتخيل كميه الناس اللى مفروض راجعه معاك

طيب لو عندك مانع اعترض

بس والله عشان برضه اخلاقهم عاليه القطار اتحرك الساعه 7

وطبعا والمتوقع ان ناس كتيره راكبه بدون حجز ومش كتير اللى يعرف حكايه السوق السوداء دى

كان القطار شويه شبه الاتوبيس

وخد عندك كمان ان التكيف مش شغال وحاولوا معاه وادانا شويه هوا وقالوا لو زاد عن كده حيتلج عشان هو يا سخن يا بارد يعنى مفيش وسط

وسمعت ناس من ورا بيقولوا انا الميه مش شغاله فى الحمام

وجينا كده عند محطه سوهاج والقطار وقف وطول وهو مش من العاده اساسا انه يوقف كتر فى سوهاج

عرفنا من بتاع البوفيه ان تقريبا كده عربيه البوفيه بدخن وشكلهم حيفصلوها من القطار

وطبعا والطبيعى وبما انه اساسا قام متأخر عن معاده وصل متأخر برضه

عمار....................يا مصر

اخيرا حنصيف

بســـــــــــــم الله الرحمــــــن الرحيــــــــــم

يااااااااااااااه اخيرا حنصيف

الواحد كان خلاص وصل لمرحله مش معقوله مش قادره اتكلم مع حد ولا حتى قادره اسمع لحد ايه الرتابه والملل الفظيع ده

الله عليكى الله عليكى يا اسكندريه ايه الجمال ده

كان فى اغنيه زمان كانت بتغنيها سميره سعيد اغنيه قديمه قوى بتقول عندى حاله ملل بفقد فيها الامل

كنت لما بسمعها بقول ايه العباطه دى فى حد يغنى يقول كده

دلوقتى انا بقالى فتره مش بقول غير عندى حاله ملل بفقد فيها الامل

بس خلاص ربنا يجيب يوم الاربعاء على خير

ويا رب الواحد يرجع المود متغير معاه هو اكيد بما ان رمضان داخل كل سنه وانتم طيبين

اه صحيح والنهارده عيد ميلادى كل سنه وانا طيبه

ويارب لما ارجع اسمع عنكم اخبار كويسه يعنى حاجه تفرح اللهم امين يا رب

اشمعنى يوم الخميس

بســــــــــــــــــــم الله الرحمــــــــــــــــن الرحيـــــــــــــــــــــم

اشمــــــــعنى يوم الخميس ليه

ليه كل حاجه حلوه بتبقى يوم الخميس او احنا بنخليها يوم الخميس

طول عمرنا من احنا وصغيرين نستنى الاسبوع يخلص عشان يجى يوم الخميس

تيجى تتفق على خروجه مع اى حد يقولك خلاص ماشى خليها يوم الخميس

تيجى تسأل عن فرح فلان او خطوبه فلان يقولولك اه ده يوم الخميس

طيب حتروح سبوع بنت فلان او ابن فلان اه هو مش يوم كذا اه هو فعلا كان كذا بس حيعملوه يوم الخميس

انا عن نفسى محبش ازعل ابدا يوم اخمس

طيب احنا ليه بنقول يوم الخميس

مفتكرش ان احنا قصدنا اليوم نفسه يمكن يكون رمز مثلا

مش يمكن نكون بندرو على حاجه نستناها بس اكيد ان الحاجه دى حتفرحنا حتجدد جوانا احاسيس

بمعنى اصح كل واحد فينا جواه حلم او احلام معينه وعشان هى حلم ممكن تتحقق وممكن لا

يعنى انا لو حلمت حلم جميل حتمنى انه يتحقق وحفضل مستنياه يعنى عايشه على امل

بس عشان انا مش متأكده انه حيحصل بأجله او ببعده بس ده ميمنعش ان برضه عيزاه بس عشان مفقدش امل انه يحصل

بمعنى اصح ان كل انسان بيرسم لنفسه حلم بس الاكيد انه حاجه حتفرحه وحيفضل يستناه

نقول ان كل واحد جواه حلم او بيحط جواه حلم يعنى حاجه يعيش عشانها

ممكن يكون امل ممكن يكون هدف بس الاكيد انه حلم بختلاف حجم الحلم ونوعه بالنسبه للاشخاص والاعمار

وممكن كمان الواحد يعيش حلم مش بتاعه بتاع حد يعرفه بس المهم انه يبقى عايش لحاجه

اى انسان بيدور على سعاده كبيره او صغيره مش مهم المهم تكون

طالت مدتها او قصرت برضه مش مهم المهم تكون

أحــزان آلام أوجاع

بســــــــــــــــم الله الرحمـــــــن الرحيـــــــــم

عارفه عارفه ايه العنوان الكئيب ده
بس ده مش عنوان ديه حقيقه احنا كنا قولنا على الحاجه اللى بتبدء صغيره وتكبر مع مرور الوقت وعرفنا انها اى حاجه
وسألنا عن الحاجه اللى بتبدء كبيره قوى وتصغر مع مرور الوقت
الحزن الالم الجرح
يبدء كبير قوى وعميق جدا تحسه كده حاجه بتعصر قلبك بتتعبك بتهلكك بتكسرك ساعات
وتقول لنفسك ممكن فعلا تيجى حاجه تعوضنى عن اللى فات ممكن قلبى يفرح من جديد لالا مش ممكن
طيب لا ممكن بس حتبقى زى اللى فاتت لا معتقدش ان فى حاجه زى اللى فاتت
اول ما يحصل قضاء الله فى اى حاجه تبقى مش قادر لا يا ناس انا والله مش قادر ممكن الالم يعصرك يقتلك تحس انك مش قادر تتنفس
او يمكن
مش عايز تتنفس
نصيبنا وقدرنا احزانا تكسرنا يا رب صبرنا على اللى احنا فيه

يكون عندك حد غالى عليك قوى يموت منك تفضل تبكى عليه قلبك يعصرك من الحزن ممكن تنام من غير ما تحس وتصحى وانت حاسس
او يمكن تكون عايز بتتمنى ان يكون مفيش حاجه حصلت بس هى فعلا حصلت
هو فعلا مات
تفضل فتره شايفه قدامك وحاسس انه معاك تدخل تدرو عليه فى كل حته بس مفيش
بعد كده تحس انك مش عايز تروح المكان اللى كان فيه مش قادر تدخله تحس بغربه
تبص لصورته تحسه معاك بيضحكلك
بس هو فعلا مات
يا رب انا تعبت يا رب مش قادر يا رب انسى
تمر عليك ايام كتيره ممكن تبقى سنين من غير ما تحس من نعمه ربنا ان الاحساس يفضل يصغر جواك شويه بشويه ويمكن كمان او الاكيد ربنا يكرمك بحد او حاجه تشغل قلبك او جزء منه ممكن تنسى بس كل ما بيجى فى بالك عنيك تدمع بس اكيد مش زى الاول وكمان ممكن تشتاق له يوحشك

اللهم اجرنى فى مصيبتى واخلفنى خيرا منها

لما البنت تكبر وتتجوز وتحس بحاجة بتتحرك جواها ويبقى كل اللى حوليها مستنين الحاجه ديه تطلع للنور ويبدءوا يعدوا الايام هو فاضل كام يعنى هو مر كذا وفاضل كذا طيب انتى حاسه بايه اه صح انتى عيزاه ولد ولا بنت والله كل اللى يجيبوا ربنا يبقى كويس بس الله لو كان كذا وتفضل رايحه جايه بيه وتتكون بينهم مشاعر محدش يحس بيها غيرهم والاب يبقى قاعد كده يتخيل نفسه يا ولد عيب متعملش كده
وتروح عند الدكتور ويقولها انا مش عارف اقولك ايه انا هو تقريبا كده الجنين مفهوش نبض
ايه لا مش ممكن طيب احنا حنستنى كام يوم يمكن النبض يرجع والكام يوم يعدوا والنبض ميرجعش
واول فرحه العيله تتحول لحزن كبير
وبرضه اللهم اجرنى فى مصيبتى واخلفنى خيرا منها
ان شاء الله ربنا حيكرمهم باحسن منها

تحب صاحبك قوى وتتمناله كل الخير وتبقى عايز ترضيه باى شكل ايه يا عم هو صاحبك ولا حبيبك
انت كنت فين كنت عند فلان ورايح فين رايح عند فلان انت خارج النهارده اه خارج مع فلان حتتغدى لا والله مش قادر شكلك متغدى بره اه والله اتغديت مع فلان يبقى لو حد بيدور عليك قولوله اسأل عليه فلان اكيد حيكون عارف
يشوفوكم فى الشارع انتوا ايه مش بتملوا من بعض مش بتزهقوا
ويجى فلان يكسرك يهزمك متجيش غير منه طيب ليه
ليه ايه لا هو اساسا محصلش لا حصل هو فعلا خانك طيب ليه عايز سبب محتاج تفهم
ولما تكلمه عن العشره والسنين يقولك سيبنا بقى من الكلام ده
تقعد فى البيت مش عايز تخرج بالاصح مش قادر تخرج طيب حتروح فين مع مين كل الاماكن كنتوا بترحوها سوا وانت اساسا مش مصاحب غيره واللى يوجعك ان الناس لسه بتسألك عليه وانت مش عارف تقول ايه والاصعب انك مش عارف تكرهه او مش قادر تكرهه
وبرضه اللهم اجرنى فى مصيبتى واخلفنى خيرا منها
ربنا يوقفلك ناس يبقوا عايزين يرضوك باى شكل عايزين يريحوك

لما يكون عندك ورد جميل زى صباح الخير الورد ده على فكره بيطلع فى الشتاء والورده دي سبحان الله عامله زى الاطفال تغمض باليل وتفتح فى الصبح اول ما تصحى تاخد الميه وتجرى عليها وتبصلها تحس انها بتقولك صباح الخير اوتلقائى كده والله من غير ما تحس تقولها صباح النور سبحان الله الورده دي عمرها مش كبير تموت تزعل عليها يطرح غيرها تحس ان قلبك يطير من الفرح

تشوف واحده او تشوفى واحد يحسوا بحاجه الحاجه ديه تفضل تكبر جواهم تفضل واهم مصدق عايش واثق تسمع من هنا وهنا وانت مش عايز رافض تصدق مسلم ومامن متعرفش بقى خيانه غدر النتيجه واحده برضه ليه المهم النصيب
بس اكيد فى طرف مغلوب على امره موجوع حزين قلبه مكسور والتانى ولا همه
وبرضه اللهم اجرنى فى مصيبتى واخلفنى خيرا منها

بس الاكيد بتيجى حاجه كده على غير توقع تقولك لسه فى خير

بسم الله الرحمن الرحيم

مَا أَصَابَ مِن مُّصِيبَةٍ فِي الْأَرْضِ وَلَا فِي أَنفُسِكُمْ إِلَّا فِي كِتَابٍ مِّن قَبْلِ أَن نَّبْرَأَهَا إِنَّ ذَلِكَ عَلَى اللَّهِ يَسِيرٌ

لِكَيْلَا تَأْسَوْا عَلَى مَا فَاتَكُمْ وَلَا تَفْرَحُوا بِمَا آتَاكُمْ وَاللَّهُ لَا يُحِبُّ كُلَّ مُخْتَالٍ فَخُورٍ

سورة الحديد

سرعه البناء وسرعه الهدم

بســــــــــم الله الرحمـــــــن الرحيـــــــــم

اولا انا بشكر كل اللى سأل عليا معلش المود مكنش متظبط شهر سته بقى وبيفكرنى بثانويه عامه الناس كلها فى الشارع وانا قال يعنى بذاكر ههههههههههه

وبعدين حنقول حاجه بدايه كده اللهم لا اعتراض على اى حاجه

والبوست ده تمهيد للبوست اللى جاى

كان فى حاجه كده زمان كنا بناخدها فى ثانويه عامه أو ممكن متكونش فى ثانويه مش فاكره بقى اذا كانت فى الكيمياء او الفيزياء او حتى الاحياء والله ممكن تكون فى جولوجيا وعلوم بيئيه اسمها سرعه البناء وسرعه الهدم بس اللى افتكره انها كمان كان ليها قانون وبما انى اساسا كنت شاطره جدا جدا جدا فى ثانويه عامه فانا اكيد مش فاكره بالاضافه طبعا للزهايمر المبكر اللى عندى ههههههههه بيعد عنكم

بس والله الواحد لو شاف كده فى كل حاجه موجوده حوليه جماد حيوان نبات انسان حيلاقى ان فى سرعه بناء وهدم انا حاليا مش بتكلم عن النظريه لان احنا اتفقنا ان اساسا كنت شاطره ومش فاكراها

لما نيجى كده نبص للمحكمه اللى بتتبنى قدام الشغل بتاعى هى اساسا كانت موجوده بس قرروا يجددوها

والله يمكن اتهدت من يومين الى خمس ايام مش فاكره برضه زهايمر وبقالها دلوقتى يمكن اكتر من ثلاث شهور من ساعت الاساس والطوب الاحمر ولسه الحكايه شكلها مطوله شويه لغايه لما الموظفين يدخلوا فيها

يعنى تتبنى فى سنين وتتهد فى يومين

لو انت جبت زهريه وحطيت جواها شويه طين وعلى شويه بذورعلى شويه ميه

واستنى عليها بقى لغايه لما تطلعلك ورده او اى حاجه عليها القيمه وانت كده حاططها بسلامه نيه على السور يجى واحد ممكن يكون لسه صاحى من النوم وخبطها وقعت من على السور نزلت ستين حته

قاعد انت تكبر فيها شهور وفى لحظه ولا كأن فى حاجه حصلت

الجنين فى بطن امه نطفه فعلقه فمضغه فعظام فكسونا العظام لحما

والست الوالده يعنى تبقى رايحه جايه بيه شيلاه تسع شهور ويجى وهو بيتولد قضاء الله اللهم لا اعتراض

الطفل اول ما بيتولد تقعد تراقبه النهارده الله فتح عنيه وبكره ماشاء الله بيحبى

وبعده سبحان الله بقى يمشى وراح المدرسه وبعدين الجامعه وهو وماشى مش بعيد يكون كان ماشى تحت السور اللى وقعت منه الزهريه هههههه وتقع عليه وقضاء الله اللهم لا اعتراض

اى حيوان بتربيه عندك فى البيت او طائر

يتولد او يفقس بقى الله اعلم ويفتح عنيه ويطلعله ريش او شعر يمشى او يطير على حسب يشرب شويه ميه متتبلعش يموت اللهم لا اعتراض

تبقى رايح جاى عند الخياطه او الترزى عشان تعملى جيبه او تعمل بنطلون

قماش بقى والنهارده تيجى تجربه وبكره نظبطه وتعالى أخر الاسبوع خده يلبسه مره وسبحان الله تحس ان نفسك قافله منه مش عارف ليه مش ده اللى كنت حتموت عليه اويشبك فى اى حاجه يتقطع اللهم لا اعتراض

تروح تجيب الخضار عشان تعمل اكله وتقعد تحضر فيها

وتفضل تحط وتشيل وتزود فى حاجات لغايه لما تبقى خلاص وفى لحظه يااما بقى تتاكل يا اما بقى ليها مصير تانى حسب طعمها

تيجى كده تتعرف على صاحب او صاحبه وتفضل العلاقه تكبر وتكبر

رايحين جانين مع بعض لدرجه ان الناس بتقولكم انتوا ايه مش بتزهقوا من بعض وتسأل على فلان لازم تلاقيه مع فلان سنين بقى مع بعض وبعدين ايه اللى حصل حد فيهم كان فى حبه انانى حد فيهم مره باع التانى على ايه على ولا حاجه اللهم لا اعتراض

نيجى بقى للحاجه الجميله اللى بيحتاجها كل انسان

اللى بتبدء صغيره قوى وتفضل تكبر شويه بشويه نظره فابتسامه فلقاء والله همم اللى بيقولوا كده

تشوفى واحد او تشوف واحده وتحس بحاجه هى ايه مش عارف وانت اساسا متغاظ عشان مش عارف بس ده ميمنعش ان الحاجه ديه او الاحساس ده عاجبك مرتاح له وتكبر جواك ووالله لو ما اخدتها مش حتجوز حد تانى ووالله لو ما اخدته حعمل فى نفسى حاجه

خلاص بقى ما همم اولادنا متحرمهومش من بعض وبعدين حاجات كتيره بتتغير ليه مش عارفه

هو مش دايما انا عارفه واعرف ناس والله ربنا يدومها عليهم وميحرمهومش من بعض

طيب ديه كانت حاجات كتيره من حولينا بتبدء صغيره وتاخد فتره لغايه لما تتبنى وتكبر وتنتهى فى لحظات او ساعات او ايام او شهور او سنين بس الفتره اللى اخدتها فى الهدم اكيد مش اسرع من اللى اخدتها فى البناء

انا عايزه اقول ايه هههههههه المعنى فى بطن الشاعر

ممكن يكون فى حد فهم وفى ناس بتحاول تفهم وفى ناس فهمت على حسب ما هى عايزه تفهم او على حسب احاسيس معينه جواها وفى حد مش فاهم

طيب احنا قولنا ان البوست ده تمهيد للبوست اللى جاى

يعنى نقول ان كل حاجه مرتبطه باى حاجه حتى لو مشاعر بتبدء صغيره وتكبر مع مرور الوقت

الا......................الاايه حد يعرف

افيدونى افادكم الله

بســـــــــــــــم الله الرحمن الرحيم

انا عايزه اسأل شوية أسأله انا على فكره مش عارفه اجابتها

1-بخصوص ملكت اليمين هى فعلا الغيت فى عهد سيدنا عمرو بن الخطاب ولا قبل كده وايه الدليل من القرأن والسنه على حرمانيه ملكت اليمين وفعلا سيدنا على بن ابى طالب كان عنده ملكت يمين

2- بخصوص جواز المتعه والمسيار الغى فى عهد مين وايه دليل حرمانيته

ولو اى حد عنده معلومه تانيه بخصوص انواع الزواج او اى حاجه مرتبطه مفيش مانع انه يضيفها وكمان ياريت كل واحد يقرأ تعليق الناس اللى كاتبينه ولو عنده تعليق على اى حد ياريت يقوله ومفيش مانع من التصحيح ده مفهاش زعل

نهايه نوفل فى حمرا دوم

بسم الله الرحمن الرحيم

اللهم اعنا على ذكرك وشكرك وحسن عبادتك

حلقه أخرى من حلقات سلسله منسيات

مين هو عمنا نوفل ده وايه حكايه حمرادوم

حمرادوم قريه من قرى الصعيد وبالتحديد فى نجع حمادى بقنا

والواحد طبعا مش حيفكركم قد ايه المناطق ديه صعبه جدا او موحشه بالعربيه الفصحى سواء فى الطبيعه بتاعتها او من ناحيه الناس اللى عايشن هناك وافكارهم والعصبيه اللى عايشين بيهاهى ممكن تكون كويسه اذا كانت زى ما بنقول

اللى ملوش كبير يشتريلوا كبير

يعنى بيجى من وراها الخير

بس بقى لو العصبيه ديه متمثله فى شحص ما هو الا كميه من الشر والرعب والاجرام زى كده

عتريس وجواز عتريس من فؤاده بالطل والكلاه ده

والاصعب بقى لو الشر ده مسنود يعنى فى حد وراه

بس اللى يضحك لو الشر ده حيقلب على الكل يعنى بلغتنا احنا اتفرعن

اه اه يا فرعون ايش فرعنك

يبقى اللى مفروض يحصل ايه والله زى ما قالوا وقال هو انه يتسرح أو يتصفى كارت محروق يعنى

ايه يا عم احنا فى مافيا روسيا هناولا ايه

نتكلم بقى شويه على عمنا نوفل أو زى ما سموه خط الصعيد

نوفل سعد ربيع الراجل ده عنده 40 سنه وتخيلوا سنه الصغير ده اللى هو المفروض ريعان الشباب عند الرجال او مرحله النضوج يعنى يدوبك لسه بيبدؤا يعملوا انجازات بس الراجل ده كسر القاعده خالص

قال يا اخونا الراجل ده عنده 40 سنه بس

لا طبعا مش بس ومن الاعيان عنده فدان ونصف أفيون و15 قضيه بمجمل 80 سنه حبس جزء منها اشغال شاقه مؤبده عشان قتل اخوه واشغال شاقه تانيه عشان قتل مجندين أمن مركزى

والباقى بقى متعدش زراعه وتجاره ومخدرات وقتل وسرقه بالاكراه ومقاومه سلطات

يا ناس الراجل ده اعتقل سنه 1986 لخطورته على الامن العام

ايه ده كل ده وسيبينه ماهو هو ده اللى احنا استغربناله

قال وانا ماشى فى الصحرا وقعت عليا ازازه ازاى ما انا استغربت

بس احنا بقى دورنا ورا الازازه قصدى عمنا نوفل وعرفنا عرفنا ايه

ايه يا عم نوفل مالك متفرعن كده ليه

قال ايه فى فتره ما بين 1995 و 1998 فاكرين الفتره ديه اللى الارهاب كان فارد فيها ضلوعه

طب يا سيتى وايه دخل ده بده ما انا جيالكم اهو بس الصبر

الحهات الامنيه استعانت بخط الصعيد نوفل

بس ايامها مكنش لسه أخد اللقب اللى بصراحه استحقه طبعا عن تعب وجداره

لا لا بالراحه علينا وفهمينا واحده واحده

افهمكم الصعايده او بعضهم عندهم حاجه انتم دلوقتى علتين وحنروح بعيد ليه

عيله نوفل سعيد ربيع اللى هيه الرباعيه وعيله الهنادوه كان بيناتهم خصومه هههههههه همم بيقولوها كده ححكيلكم عنها بعدين

بس بقى فضلوا دول يقتلوا واحد من هنا التانين يردوا عليهم بواحد من عندهم

فهنا بقى كان الذكاء حاجه كده بالشبه

انا دلوقتى لو استعنت بالراجل ده وحطيته ساتر بالطبع محدش حيقدر يقربله لحسن يبقى تار

وندخل بقى فى مولد وصاحبه غايب ويبقى موسم جنى الناس

وفعلا اللى سمعناه ان الجهات الامنيه كانت عامله ابراج حراسه قدام الاماكن الذات اهميه فى نجع حمادى وكان بيحرسها رجاله نوفل

هيه بصراحه ملعوبه صح

وعادى ومش عيب اللى تغلب بيه العب بيه

بس دايما تاتى الرياح بما لا تشتهى السفن

الراجل ده شاف نفسه اه طبعا الذراع الايمن للحكومه مين قدك يا سيدى

بس برضه عشان احنا هنا فى ذكرى راجل ميت نقول اللى لينا واللى علينا والله اعلم

المذكور اعلاه خط الصعيد نوفل قال انه كان على استعدا انه يسلم نفسه

يعنى ايه بقى انتى عايزه تقولى انه كان حيتحاكم فى 80 سنه حبس

والله يا ناس هو اللى قال مش انا يعنى انا حجيب حاجه من بيتنا

ما عمنا جمال سليمان فى حدائق الشيطان تاب ولا هيه حلوه فى التمثيل مره فى الحقيقه

بس بقى مكنش عايز يسلم نفسه لبعض ظباط قنا ليه قال عشان عايزين يصفوه ميحكمهوش

هوشــــــــــــــــــشش منجيبش سيره

بس استنوا كان بيقول انه حيكشف اشياء خطيره واسرا مفزعه وحتودى الكل فى خبر كان

وبعدين فى حد بيزرع فدان ونصف أفيون ومحدش يحس بيه

بس بقى مخلاص مش قولنا هوشششششش

متوديناش فى داهيه

والله يا ناس هو اللى قال

اه صح بسرعه كده عشان مننساش حكايه العلتين

الرباعيه عيله نوفل سعيد ربيع والهنادوه وميراث الدم ايه الغنى الفاحش ده دم مره واحده

كان بسبب ايوه هو السبب الكبير ده الحد الفاصل بين الاراضى الزراعيه

عمنا سعيد ربيع والد نوفل كان عايز يحول الباطل والله ما كنت اعرف معناه اللى هو الحد الفاصل بين الاراضى بتاعتهم لترعه الهنادوه طبعا مرضوش أستأجروا احمد عذار برضه معرفش مين ده المهم قتل والد نوفل بس بقى وواحد من هنا وواحد من هنا لغايه لما بقوا عشره

الحمد لله ان نوفل مات والا الواحد كان خايف ليطلع من عندهم ويلقى حتفه حلوه الحته ديه

بس بقى خلينا فى المنظر الاخير نهايه الخط

بعد محاصره دامت لآكثر من 6أشهر ليه يعنى مش عارفين يدخلوا

اه البيت عليه حراسه 200 رجل من رجال نوفل كتيبه يعنى فاضلهم 2 عساكر ويعلنوا الحرب على رأى عمنا اللمبى

وعامل قدام البيت مجرى مائى عشان المدرعات متعرفش تدخل مدرعات مره واحده مش بقول لكم الحكايه كبيره

اربع مدرعات و30 سياره شرطه

الظاهر ان الراجل ده كان فعلا مفروض يتصفى

بس بقى المعركه استمرت 7 ساعات واستخدم فيها قنابل مسيله للدموع وكميات كبيره من الرصاص وكانت النهايه

انتصرنا انتصرنا

وقتل الخط نوفل واصيبت ابنته وابن شقيقه ومجندين

بس بقى فى حاجه تانيه احنا مش عارفينها

والله لو عرفتوا انتوا ابقوا قولولى

يا أخونا الناس دول محتاجين تبصير يعنى محتاجين مننا ان احنا نفهمهم أكتر ونوصل لنقطه اتفاق نعرف من خلالها التعامل معاهم

مينفعش نبقى بعاد عنهم كده فى فجوه واسعه قوى ما بنا وياريت متوسعش اكتر

الحق انا بقى استخبى

الله المستعان

اللهم انى أسألك من خير ماسألك منه عبدك ونبيك سيدنا محمد عليه الصلاه والسلام

واستعيذ بك من شر ما أستعاذ بك منه عبدك ونبيك سيدنا محمد عليه الصلاه والسلام

ان تنصروا الله فلا غالب لكم

بسم الله الرحمن الرحيم

ديه اول مره ليا اكتب انا مجربتش قبل كده اكتب موضوع واللى عرفنى بالمدنونات امانى بنت الجنوب

ويوم ما عملت المدونه عملتها عشان اعرف اعلق على بعض المواضيع عند بعض الاشخاص ديه اذا سمحوا لى طبعا

بس اللى خلانى اكتب حاجه موضوع استفزنى قوى والاكيد انه جارحنى زى ما هو جارح كتير غيرى انا حاسه فعلا انى مخنوقه وفى حاجه تقيله قوى على قلبى قولت اتكلم معاكم يمكن يزيح شويه عنى

فى الاول حقول حاجه حصلت بس طبعا الله اعلم

من كام يوم كده سمعت من ناس ان فى قناه فضائيه اذاعت خبر ان هناك سيده انجبت طفله وهذه الطفله نطقت بجمله واحده وانتقلت الى رحمه الله

ايها المسلمون احترسوا من 7/7/2007

ايها المسلمون احترسوا من يوم 7/7/2007 والله اعلم

ولكن ليس هذا ما جرحنى وارعبنى على حال المسلمين ما اشعرنى بالاهانه كنت جالسه امام التليفزيون واذا ببرنامج العاشره مساءا و90 دقيقه الاثنين يتحدثوا فى موضوع واحد ويبدو ان هذا الموضوع مطروح منذ فتره

الا وهو انه نحو 350 شخص كانوا على الدين المسيحى ودخلوا فى الاسلام من اجل اغراض شخصيه ومن ثم رجعوا او المسمى الاصح انهم ارتدوا مره اخرى الى المسيحيه بعد انقضاء الغرض

ونظره سريعه الى هذه الاغراض

نحو 100 شخص رجل وسيده من اجل الحصول على الطلاق او الخلغ

نحو70 شخص شاب وفتاه كانوا مرتبطين عاطفيا فمن اجل توطيد العلاقه

نحو 50 شخص من من حكم عليهم فى بعض القضايا مثل التزوير

هههههه انها فعلا اسباب قيمه ذات معنى من اجلها يتركوا دينهم

الجرم الاكبر انهم الان يريدون حقهم حيث انهم منعوا من ان يضيفوا كلمه مسيحى الى البطاقه وانا اقول كلمه لانها بالنسبه لهم ليس دين

ولكن اين حقنا نحن كمسلمين اليس من حق الاسلام ان يستتاب هؤلاء الاشخاص ومن ثم يقام عليهم الحد

نحن كمسلمين لا نتمسك بيهم فى ديننا لانهم لا يزيدونا بل انهم يضعفوا شوكتنا

وامتثلا لقول الحبيب الطاهر الصادق الامين سيدنا ونبينا وشفيعنا محمد عليه افضل الصلاه والاسلام

انما الاعمال بالنيات ولكل امرؤ ما نوى فمن كانت هجرته الى الله ورسوله فهجرته الى الله ورسوله ومن كانت هجرته الى امرأه ينكحها او دنيا يصيبها فهجرته الى ما هاجر اليه

ولكن لنا حق اين حكم الرده

اه سوف يقال الان ان المسلمين سفاحون وما الى ذالك ولكننا نتبع ديننا الذى ارتضينا به دينا من البدايه

ولا ذنب لنا فى اشخاص لم يرتضوا بتشريعات دينهم واستبدلوه من اجل الحصول على اغراض شخصيه اقل ما يقال عنها انها تافهه

ولكن ودائما سؤال وبلا اجابه

هل لنا حق

سيدنا محمد صلى الله عليه وسلم قال انتظروا الساعه قيل ومتى الساعه يا رسول الله قال اذا ضيعت الامانه قيل وكيف تضيع الامانه قال اذا وسد الامر لغير اهله

اللهم اهلك الظالمين بالظالمين

اللهم زلزل الارض من تحت اقدامهم

يا رب ارحمنا واجرنا من الليل الذى ذاد وطال واخرج علينا النهار

اللهم انى اسالك من خير ما سالك منه عبدك و نبيك محمد عليه الصلاه والسلام

واستعيذ بك من شر ما استعاذ بك منه عبدك ونبيك محمد عليه الصلاه والاسلام